Dovrebanen: Otta bru stengd for trafikk til midten av april

Sjå informasjon hos SJ Norge og Vy om trafikkavviklinga på Dovrebanen.

Saka blir oppdateret.

Startar utbetring

30. jan kl. 14.00:  Kartlegginga av skadeomfanget på Otta bru viser at det er nødvendig å forsterke det sørlege landkaret før vi kan opne for normal trafikk. Slik det ser ut no vil vi ha utført nødvendige tiltak og kan opne for trafikk i midten av april. Oppdatert status kjem 25. februar kl. 12:00.

– Vi jobbar så raskt vi kan for at Otta bru skal bli klar for trafikk igjen. Dovrebanen er ei svært viktig strekning, og vi forstår at dette er ein krevjande periode for både passasjerane og togselskapa som fraktar personar og gods. Det er veldig leitt at vi opplever slike stengingar, og derfor har arbeidet med å utbetre Otta bru høgaste prioritet, seier Bane NORs strekningssjef for Dovrebanen, Philippe Olivier.

Arbeidet med utbetringa vil bestå av ei forsterking og justering av landkaret. Arbeidet inneber blant anna spunting, som vil skje på dag- og kveldstid.

Kartlegg skadane på brua

27. jan. kl. 12.15: Arbeidet med å fjerne is og fylle på med masse for å verne det skadde landkaret held fram mot helga. Vi har fått ei stor opning på isen, både på nordsida og sørsida av elva. Det er vesentleg mindre is, og vatnet flyt godt forbi brua.

Vi har laga ein anleggsveg som isolerer landkaret slik at det ikkje er noko vatn som treff det lengre.

Vi har starta med å kartleggje skadeomfanget og har sett i gang tiltak for å forsterke landkaret. Undersøkingane så langt viser at det er vaska ut ein del masse rundt landkaret, men at skadane er avgrensa.

Vi må gjere ei fullstendig kartlegging av skadeomfanget før vi har oversikt over alle tiltak som må til for å reparere brua. Ny prognose for opning kjem 30. januar.

Fjerning av is har hatt god effekt

23. jan. kl. 12.20: Arbeidet held fram med å fjerne is under brua. Dette arbeidet har god effekt, og vi har no fått ei stor opning på nordsida av elva. Vi er også i gang med å fylle på med stein oppstraums for å leie vatnet vekk frå landkaret.

Det er vesentleg mindre kraft i straumane, og det er mindre vassføring.

Arbeidet med å stabilisere brua har så langt vore vellykka. Det er berre registrert minimalt med rørsle sidan tysdag morgon, og brua er stabil på noverande tidspunkt. Vi har fått på plass ei kran som kan hjelpa til i sikringsarbeidet ved behov. 

Vi legg no til rette for å undersøkje landkaret nærare, så vi får full oversikt over skadane. Deretter skal vi planleggje kva tiltak som trengst for å utbetre brua.

Vi forventar at Dovrebanen vil vere stengd for trafikk mellom Vinstra og Dombås minst fram til 5. februar. Vi vil gje ein ny prognose når vi får betre oversikt over situasjonen.

Rørosbanen blir nytta som omkøyringsmoglegheit for nokre av godstoga medan Dovrebanen er stengd for gjennomgåande togtrafikk. Innafor dagens ruteplan er det plass til å køyre tre-fire daglege godstog ekstra i kvar retning på Rørosbanen. Persontogtrafikken på Rørosbanen går no som normalt.

Tiltak for å avgrense skadar på brua

22. jan. kl. 15.15: Vi held fram arbeidet med å stabilisere situasjonen og avgrense skadar på jernbanebrua på Otta.

Stor isdanning og mykje vatn i Ottaelva har ført til at vatnet har grave seg inn i elvebreidda og rundt det sørlegaste landkaret på brua. Landkaret er den delen av brua som står på land.

Arbeidet med å fjerne is under brua har hatt god effekt. Vi har fått vekk ein god del is på nordsida, men arbeidet tek tid fordi det er vanskeleg å nå fram til isen. Vi byggjer derfor anleggsvegar for å komme fram. 

Vassmengda i elva har byrja å minke, både naturleg og fordi vi har fått god hjelp frå kraftverka Hafslund og Eidefoss som sette inn strakstiltak for å redusere vasstilførselen til elva ved Otta bru. Lokale entreprenørar og grunneigarar er også til stor hjelp.

Brua har ikkje rørt på seg sidan målinga tysdag morgon. 

Vi forventar at Dovrebanen vil vere stengd for trafikk mellom Vinstra og Dombås minst fram til 5. februar. Vi vil komme med nye prognosar når vi får betre oversikt over situasjonen.

Situasjonen framleis uavklart

21. jan. kl. 17.20: Situasjonen ved Otta bru er framleis uavklart, og skadeomfanget på brua blir kartlagt. Vi har ikkje registrert noko meir rørsle på det sørlege landkaret etter målinga i dag tidleg. Landkaret er den delen av brua som står på land.

Vi jobbar for å stabilisere situasjonen ved å fjerne is, og skal fylle på med stein oppstraums for å avlaste landkaret.

Vi har fått god hjelp frå kraftverka Hafslund og Eidefoss som har sett inn strakstiltak for å redusere vassmengda i elva. Vi jobbar også for å få inn ei kran som kan bidra i sikringa av brua.

Rørosbanen er omkøyringsmoglegheit for godstoga når Dovrebanen er stengd for gjennomgåande togtrafikk. Innafor dagens ruteplan er det plass til å køyre tre-fire daglege godstog ekstra i kvar retning på Rørosbanen, og dette vil truleg bli gjort så snart som mogleg. Persontogtrafikken på Rørosbanen går no som normalt.

Skal fylle opp med stein for å avlaste brua

21. jan. kl. 12.24: Landkaret, som er endestøtta for brubanen på land, er fundamentert på lausmassar. Vatnet har grave rundt landkaret, og det er konstatert rørsle på landkaret.

Tysdag prioriterer vi å fjerne mest mogleg is som har bygd seg opp i elva slik at vasspresset inn mot landkaret på sørsida minkar. Samtidig planlegg vi å fylle ut stein i elva oppstraums for landkaret for å avlaste ytterlegare.

Parallelt vurderer vi andre tiltak for å stabilisere situasjonen. Utbetring av dei skadane som har oppstått vil ta tid, men det er for tidleg å seie noko eksakt om varigheita. Førebels forventar vi at Dovrebanen mellom Vinstra og Dombås minst vil vere stengd fram til 5. februar. Vi vil komme med nye prognosar når vi får betre oversikt over situasjonen.

Stoppar togtrafikken av hensyn til tryggleiken

21. jan. kl. 10.53: Ottaelva har dei siste dagane grave seg inn mot den sørlege elvekanten på grunn av opphoping av is ved Otta bru.

Vi overvaker situasjonen nøye, og valde natt til tysdag å stoppe trafikken. 

– Elva har også grave seg inn mot det sørlege landkaret på jernbanebrua. Vi stengjer trafikken av hensyn til tryggleiken, seier regiondirektør Kristine Jessen.

Landkaret er den delen av brua som står på land.

Avklarer situasjonen

Tysdag morgon jobbar vi med å kartleggje skadeomfanget, og det er sett inn strakstiltak for å senke vasstanden. 

– Måndag kveld byrja vi arbeidet med å fjerne is frå elva. Dette vil forhåpentleg sørgje for at vasstanden blir senka ved at meir vatn kan gå gjennom brukarane. Vi jobbar samtidig med tiltak for å stabilisere elvebreidda og landkaret. Vi følgjer situasjonen nøye, seier Jessen.

Det er førebels usikkert kor lang tid det vil ta før trafikken kan byrje å gå igjen. 

Sjå informasjon hos SJ Norge(åpnes i ny fane) og Vy(åpnes i ny fane) om trafikkavviklinga på Dovrebanen.

Forstørr bildet