Randklev bru er opna for togtrafikk

Sidan Randklev bru vart øydelagd under uvêret Hans i fjor, har det gått føre seg intensivt arbeid for å få brua opp igjen. Måndag kveld kunne me ønskja det første godstoget over før persontoga følgjer på tysdag morgon.

– Dette er ein dag mange har venta på. Endeleg kan me opna Dovrebanen for gjennomgåande trafikk igjen, seier Thor Gjermund Eriksen, konsernsjef i Bane NOR.

Dovrebanen er ei viktig strekning for både gods- og persontrafikk.

– Dovrebanen er samfunnskritisk viktig fordi strekninga har kapasitet til å frakta store volum mat og andre nødvendige varer effektivt mellom Austlandet og Midt-Noreg. Tog er også det mest klimavennlege og trafikksikre transportalternativet for både personar og gods, seier Eriksen .

Den nye brua toler meir ekstremvêr

Det var i august 2023 at ekstremvêret «Hans» herja Gudbrandsdalen. Ekstremvêret førte til jordskred, flaumar fleire stader i landet, og elva Gudbrandsdalslågen fløymde over. Dei store vassmengdene i elva førte til at eit av brufundamenta til Randklev bru velta, og dermed hamna to av bruelementa i elva.

I tillegg til reparasjon av bruelementa, har Bane NOR bygd eit nytt fundament. Det nye fundamentet har ei større grunnflate, og er betre sikra mot erosjon og undergraving for å tola meir ekstremvêr på grunn av klimaendringar. Samtidig er det utført erosjonssikring av det andre brufundamentet.

– Me har jobba intensivt med å opna opp brusambandet så raskt som mogleg. Dette prosjektet har hatt høgaste prioritet hos oss, seier Eriksen.